MODJADJISKLOOF: Mokgatlo wa Build One South Africa (BOSA) Limpopo o butše molato kgahlanong
le Masepala wa Greater Letaba setišing sa Modjadjiskloof ka Labone, 7 Phato 2025 mabapi le
bohodu bja R1.2 millione ke bašomi lefapeng la dilaesense. Go thwe tšhelete yeo e bego e swanetše
go lokelwa ka gare ga sekhwama sa masepala e utswitšwe magareng ga Dibatsela 2021 le Hlakola
2023.
Go ya ka BOSA, bohodu bjo ke tshelo ya molao wa taolo ya ditšhelete tša masepala wo o laelago
gore tšhelete yeo e amogelwago masepaleng e swanetše go tsena sekhwameng.
“Efela bašomi ba masepala ba ile ba tshela molao wo ka go dira ka tsela yeo e sa dumelwago,” gwa
realo Timothy Maluleke yo e lego moetapele wa BOSA Limpopo.
Maluleke o galefetše masepala ka go dumelela bohodu le go leka go bo šireletša. “Ga se feela ka
tšhelete ye e lahlegetšwego eupša ke pontšho ya go tšwela pele go palelwa ga pušo moo bohodu bo
homolelwago mme tšhomišompe e amogelwago bjalo ka mpho,” a realo.
BOSA e re bašomi ba bantši bao ba amegago molatong wo ba ile ba tlogela mešomo pele dinyakišišo
tša ka gare di fetšwa mme ba hwetša ditšhelete tša bona tša phenšene. Ba bangwe bao ba ilego ba
fegwa ba boetše mešomong.
Mokgatlo o nyaka gore go tšewe magato ka pela kgahlanong le bao ba amegago. Tšhelete yeo e
utswitšwego e swanetše gore e bušwe, molaodi wa masepala a fegwe, go dirwe ditlhahlobo tša
ditšhelete tša masepala mme bao ba boletšego ka bohodu bjo ba šireletšwe.
“Tšhelete yeo e be e ka thuša go matlafatša kabo ya ditirelo, ya lokiša ditsela, meetse le go thekga
dikliniki,” gwa realo Maluleke.
Maluleke o re ba tla tšwela pele ka taba ye go fihla tšhelete yeo e utswitšwego e bušwa morago
mme bao ba bonwago molato ba otlwe.
Mmoleledi wa masepala, Lovers Mainetje, o re khansele e šogana le taba ye gomme ga a kgone go
bolela kudu ka yona.
