MMEGI WA SEIPONE
POLOKWANE: “Ke lethabo le legolo go nna go ema pele ga lena mo modirong wa go se
lebalege wo o laetšago kgato e bohlokwa leetong la rena la go fetola maphelo a
magagaborena. Mamohla go re gopotša gore tšwelopele ya nnete e agilwe kgato ka kgato,
sephetho ka sephetho ka ge Roma e sa agwa ka letšatši le tee. Le ge go le bjalo, phihlelelo e
nngwe le e nngwe, kgato e nngwe le e nngwe ya go ya pele, e nyaka sebete le go tšeya
diphetho tšeo di ikokotletšego ka boetapele bjo maatla bjo bo tšeago diphetho tlhologelong ya
mašabašaba a batho,” gwa realo Tonakgolo, Ngk. Phophi Ramathuba, nakong ya moletlwana
wa go bontšha dikgerekgere tšeo mmušo o di rekilego lepatlelong la Peter Mokaba ka
Laboraro la 3 Manthole (Disemere) 2025.
“Boetapele ga se bokgabo bja go dula setulong goba go swara maemo – ke sebete sa go tšeya
diphetho ka setu mola ba bangwe ba sa dikadika, lentšwana la go fola la go šupa fao go
swanetšego go iwa gona ka nako ya ge seo se nyakega. Boetapele bja nnete ga se bjo bo
binelago go hwetša maemo phatlalatša eupša bo bonala go morethetho wa tumelo, go kgato
ya sebete yeo e tšewago kgahlegelong ya bohle, go maikemišetšo ao a sa tekatekego a go
kgetha sa therešo esego se bonolo le go nyaka go fa dikarabo go mašabašaba ao a beilego
tshepo ya wona godimo ga rena,” Ramathuba a realo ge a tšwela pele.
Tonakgolo o lebogile Molekgotlaphethiši Rachoene le sehlopha sa gagwe sa Kgoro ya
Mešomo ya Setšhaba, Ditsela le Mafarahlahla. Boitlemo bja bona bja go se tekateke bo dirile
gore ba reke molokoloko wa dikgerekgere tše serolwane le tše tšhweu tšeo di tlago fetola
maphelo a ditšhaba. Tonakgolo o re ge motho a e lebeletše ka godimo, ye e ka no bonala
bjalo ka tiragalo ya go neelana difatanaga. Fela ge go bolelwa nnete, ye ke pego ya
maikemišetšo, polelo ya gore mmušo wo o tšeela tabo ya kabo ya ditirelo godimo. Ye ke
tshepišo ya gore mmušo o tla ya go batho fao ba lego gona – mebileng, metseng le mathateng
ao ba kopanang nawo a letšatši ka letšatši.
“Mengwagangwaga ditšhaba tša gaborena ga se tša ka tša dikadika go re botša fao re
palelwago. Di ngwadile mangwalo, di boledišane le makhanselara, di boletše dikopanong le
go diriša mekgwa ka moka go tšweletša go se kgotsofale ka titelego ya tlhokomelo ya ditsela
le go lokišwa ga go tšeya nako e telele. Dikgokgono tše ga se tša go se kwagale. Di tšwa go
badudi bao ba tshepilego rena go humana ditsela tša go bolokega, meago ya setšhaba ya go
šomišega le ditirelo tša setšhaba tša serithi.
“Fela a re kwešišaneng: molokoloko wa dikgerekgere o dira tlhaologanyo feela ge o fetoga
ditiragalo. Ge difatanaga tše di tloga fa mamohla, mošito wa tšona o swanetše gore o kwagale
ka pelapela. Ditsela tšeo e lego kgale di senyegile, di swanetše go thoma go laetša
tšwelopele,” Tonakgolo a realo.
