TIYANI: Go be go foka moya wa manyami nakong ya ge makgolokgolo a badudi a kgobokane
tirelong ya poloko ya batho ba lesomepedi bao ba hlokofetšego kotsing e šoro tseleng ya R81 kgauswi
le GaSekgopo ka ntle ga Modjadjiskloof ka Sontaga sa 28 Lewedi 2025.
Bahu, Grace Ntsenyani, Rose Mawila, Collen Maluleke, Livhuwani Sarila, Kayanene Sarila (7), Rose
Mnyuku, Agnes Sambo, Rose Maswanganyi, Joyce Chauke, Masingita Mabodze, Gift Ngwenyama, le
Daphney Mabasa ba bolokilwe ka Mokibelo, 4 Diphalane motseng wa Tiyani ka ntle ga Giyani.
Ba hlokofetše ka morago ga ge thekisi yeo ba bego ba e nametše e thulana le dilori tše pedi.
Tonakgolo, Ngk Phophi Ramathuba, o be a le gare ga malapa a bao ba hlokofaletšwego nakong ya
tirelo yeo e bego e tletše ka mahloko.
O hlalošitše tiragalo ye bjalo ka nako ye bohloko kudu profenseng. “Ge re le ka fase ga leru le boima
la bohloko, re gopotšwa bohloko bja bophelo le go se be le maatla ga rena ka moka. Tahlegelo ya
meoya ye lesomepedi e tsentše profense ya rena bohlokong gomme dipelo tša rena di kwa bohloko
bjalo ka tša malapa ao a amegilego,” a realo.
Ramathuba o hlohleleditše setšhaba go hwetša maatla ka kopano le lerato. “Re be re ka se be bagwera
maabane eupša lehono bohloko bo re kopantše. Re ka thušana go alafa dintho tše bohloko re le
mmogo,” a realo.
O tshepišitše gore mmušo o tla tšwela pele go thuša malapa ao a amegilego, kudu bana bao ba šetšego
ba se na batswadi.
“A re se keng ra dira ditshepišo tša go feta bjalo ka moya wa phefo. Mmušo wa rena o tla netefatša
gore bana bao ba amegilego ba hwetša thuto le thušo ya leago ka mananeo a mmušo,” gwa realo
Ramathuba.
Ramathuba o kgopetše baotledi go otlela ka tlhokomelo. “Kotsi ye e re gopotša bohlokwa bja go
otlela ka tlhokomelo le maikarabelo ditseleng,” a realo.
Kgoro ya Dinamelwa le Tšhireletšego ya Setšhaba e tiišitše gore dinyakišišo mabapi le sebakwa sa
kotsi di sa tšwela pele.
