POLOKWANE: Palomoka ya bahlankedi ba dilaesense ba 42, go akaretšwa bahlahlobi (examiners),
bangwaledi (clerks) le bao ba šomago ka dikolo tša go otlela (driving school operators), ba swerwe
go ralala le profense ya Limpopo ka lebaka la melato ye e amanago le bomenetša.
Mohlankedimogolo wa dikgokagano wa Lekala la Taolo ya Sephethephethe sa Mebileng
(RTMC), Simon Zwane, o tiišeditše go swarwa mo go diregilego mengwageng ya ditšhelete ya
2024/2025.
“Bahlankedi ba ba lebane le ditatofatšo tša boradia/bofora, bomenetša le go tshela Molao wa
Sephethephethe sa Mebileng (Road Traffic Act),” a realo.
Zwane o re magareng ga bao ba swerwego, go bona bahlankedi ba 11 ba golegilwe mo Polokwane
ka Lewedi 2024 mola ba 24 ba golegilwe ka Hlakola 2025. Kgweding ya Phato 2024, balaodi ba
golegile gape mohlahlobi yo tee le bakgopedi (applicants) ba tshela mo Lebowakgomo.
Gape o utolotše gore ba bangwe ba balatofatšwa ba šetše ba bonwe molato.
“Bahlahlobi ba šupago go tšwa seteišeneng sa praebete sa go dira diteko, Phalala, ba bonwe
molato melatong ye 51 ya boradia/bofora. Ka Pherekgong 2025, ba ahloletšwe mengwaga ye
mehlano kgolegong goba tefo ya R20,000 yo mongwe le yo mongwe ka lebaka la go ntšha
disetifikeiti tša difatanaga tša bofora tša go di dumelela go ba tseleng,” gwa realo Zwane.
Dinyakišišo di utolotše gape le dilaesense tša go otlela le tša baithuti tšeo di filwego ka tsela yeo e
sego molaong.
“Bakgopedi (applicants) bao ba amanago le go swarwa ka Lephalale, Thabazimbi le Bela Bela, ba
tla lebana le magato a molao gomme dilaesense tša bofora di tla phumolwa,” Zwane o tiišeditše.
Mmoleledi wa Kgoro ya Dinamelwa le Polokego ya Setšhaba ya Limpopo, Mna Tshifiwa Dali, o
re:
“Batho bao ba swerwego ke bahlahlobi ba mangwalo a go otlela esego bahlankedi ba
sephethephethe. Kgoro e sola ditiro tša bona ebile bomenetša bja go fa dilaesense bo tsenya
letsogo go koketšego ya dikotsi tša mebileng,” a realo a laetša gore batho ba go reka dilaesense ba
bapala karolo go dikotsi tša mebileng.
Dali o re: “Go molaleng gore baotledi bao ba hweditšego mangwalo a bootledi ka bofora, ba beya
maphelo a bašomiši ba tsela kotsing. Batho ba maitshwaro a mabjalo ba ka se tsoge ba hweditše
thekgo go tšwa go rena”.
Kgoro e re e šomišana le RTMC
“Re šomišana le RTMC go lwantšha bomenetša ka mo e lego gore dilaesense tša barutwana di
ngwalwa ka dikhompyutha. Re tla šomiša le mekgwana ye mengwe ya theknolotši go ba beya
leihlo go netefatša tshepedišo ya maleba,” gwa realo Dali.
