POLOKWANE: Mokgatlo wa African National Congress (ANC) mo Limpopo o šetše o
thomile mošomo wa go lokišetša kopano ya bolesometee ya go kgetha baetapele ba mokgatlo
mo profenseng. Kopano ye e beakanyeditšwe go thoma ka di27 go fihla ka di29 Hlakola 2026
mme dithulaganyo tša makala di gare di a kgatlampana go ralala le profense.
Mongwaledi wa mokgatlo, Reuben Madadzhe, o re komiti ya taolo ya profense (PEC) e
netefaditše gore dithulaganyo di šetše di kgatlampana ka morago ga go amogela pego yeo e
tšweletšago merero ya ditokišetšo ka botlalo. PEC e hlomile komiti ya ditokišetšo tša kopano
ya profense yeo e tlago go laola dikarolo ka moka tša dithulaganyo, go akaretšwa
dikgokagano, ditirelo tša ditshepedišo gammogo le go kgetha baemedi.
“Dithulaganyo tša kopano ye di amogetšwe ka di27 Dibatsela 2025 gomme di šetše di
abetšwe le go tsebišwa makala a mokgatlo profense ka moka. Dilete tše hlano ka moka di
šetše di hlahletše metheo ya tšona ya tšweletšo ka di6 Manthole 2025 go netefatša gore
dithulaganyo di sepela gabotse pele ga kopano gomme letšatši la go tswalelela maloko e be e
le la di31 Manthole 2025,” a realo.
Madadzhe o rile karolo e bohlokwa dithulaganyong tše ke dikopano tša makala (BGMs) tšeo
PEC e di gatelelago bjalo ka motheo wa tokologo ka gare ga mokgatlo. Dikopano tša go tiiša
maloko ao a tlago go tšea karolo kopanong di tla swanela go swarwa go thoma ka di 01 go
fihla ka Mokibelo, 17 Pherekgong 2026.
O re go tloga ka Labobedi, 20 Pherekgong go fihla ka Mokibelo, 28 Dibokwane 2026, BGMs
di tla tsena go mohuta o bohlokwa wa go kgetha baemedi bao ba tlago go kgetha baetapele.
Se se akaretša le maemo a sekgoba seo se fišago kudu sa modulasetulo wa profense, seo go
thwego Tonakgolo Ngk. Phophi Ramathuba gammogo le Meyaraphethiši wa Masepala wa
Polokwane, CllrMakoro Mpe, ba ka emišana ka maoto go se hwetša.
“Bangwaledi ba makala ba laetšwe go boloka dingwadišo tša bao ba tsenetšego dikopano ka
nepo, go latela mananeo ao a dumeletšwego gammogo le go šomiša ditsela tša semmušo tša
dikgokaganyo go tsebiša maloko. Ditshedimošo ka moka di swanetše go romelwa diofising
tša dilete go ya le ka melao ya mokgatlo,” gwa realo Madadzhe.
Ka ge maikutlo a dipolitiki a golela godimo le merero ya go uwauwetša bakgethi, kopano ye
e letetšwe go bopa le go fetola tsela ya bokamoso bja ANC mo Limpopo ge go lebilwe
dikgethong tša dimasepala.
