Badudi ba Seshego ka ntle ga Polokwane ba re seemo se ga se ba thabiše ka ge ditlakala tša bona di feditše matšatši di sa tšewe. Se se hlotše gore mebila e mengwe ya bona e tlale ka ditlakala mme di thome go nkga bošaedi. Ba re dimpša di lala di senya mekotlana ya bona bošego ka ge di nyakana le dijo. Se se dira gore ditlakala tšeo di phatlalale le mebila. Kamogelo Leshabane (46) o re ditlakala tša bona di tšwela pele go oketšega.
“Mafelong ao re beyago ditlakala gona gore masepala o tle o di tšeye, go thoma go nkga bošaedi. Go boima ka gore a mangwe a mafelo ao ke ka ntle ga malapa a rena kgauswi le diheke. Monkgo wo o hlolwa ke gore ditlakala tše dingwe di senyegile kudu,” a realo.
Peter Mooka (40) o re ba boifela seemo sa maphelo a bana ba bona. “Re gapeletšega go ba notlelela ka malapeng ka ge ba ralokela kgauswi le ditlakala tšeo ka gore ba ka feleletša ba fetetšwe ke ditwatši,” a realo.
Jacob Meso (39) o re ga ba kwešiše gore ke ka lebaka la eng masepala o palelwa ke go tšeya ditlakala tša bona. “Re lefela ditirelo masepaleng, ka fao, se se ra gore re lefela lefeela ka gore ga re direlwe selo. Sa pele e be e le meetse, gonabjale ke ditlakala. Seemo se se ile go re gapeletša go lahla ditlakala tša rena mo re sa dumelelwago ka gore re ka se kgotlelele go dula le ditlakala tša go nkga ka malapeng a rena. Go se be le motho yo a re fago kotlo ge re dira bjalo,” gwa realo Meso a befetšwe.
Mmoleledi wa masepala, Thipa Selala, o re ka lebaka la seemo se, ba kgopela badudi bao ba šetšego ba beile ditlakala tša bona mafelong a ditlakala gore ba di tlogele fao.
“Masepala o šogana le tharollo ya se mme bašomi ba rena ba ile go šoma ka thata go tšeya ditlakala tšeo di beilwego. Re kgopela tshwarelo ka mathata ao a hlotšwego ke seemo se ebile re leboga tšhomišano ya badudi nakong ye,” gwa realo Selala.
