SHALLY MACHETHE
SESHЕGO – Batho ba bantši ba nwa meetse letšatši le letšatši ba sa tsebe gore a fetile maemong afe a go hlwekišwa pele a ka fihla ka mapotlelong. Go hlwekiša meetse ke tshepedišo e bohlokwa yeo e dirišago saense le theknolotši go tloša ditšhila le diphedi tše kotsi gore meetse a bolokege bakeng sa go nwewa.
Oasis Water ke e nngwe ya dikhamphani tšeo di tšweletšago le go rekiša meetse ao a hlwekišitšwego. Khamphani ye e diriša magato a mmalwa go hlwekiša meetse pele a fihla go bareki. Tshepedišo ye e bontšha ka moo saense e šomišwago ka gona go dira gore meetse a bolokege.
Kgato ya mathomo ke yeo e bitšwago ‘sediment filtration’, e lego kgato ya go sefa ditšhila tše dikgolo bjalo ka maraga, mabjang le diphatiana. Ka morago go latela seo se bitšwago ‘element filtration’ moo ditšhila tše dinnyane bjalo ka maboya, digare le mahlokwana di tlošwago ka gare ga meetse. Meetse a tšwela pele go ya go seo se bitšwago ‘reverse osmosis’, e lego mokgwa wo meetse a gapeletšwago go feta gare ga letlalwana la mašobana a mannyane (membrane) leo le ikgethilego fao meetse a tšwago ka go tshotshoma. Magato a ka moka a thuša go tloša dilo tšeo di sa nyakegego meetseng.
Ka morago ga dikgato tša go hlwekiša meetse tšeo di boletšwego, go dirišwa seo se bitšwago ‘carbon filtration’, moo gase ya khabone (carbon) e thušago go fokotša dikhemikale, menkgo le tatso yeo e sa nyakegego. Go tloga mo, meetse a latela seo se bitšwago ‘UV treatment’, moo mahlasedi a bogale a ‘ultraviolet’ a dirišwago go thuša go bolaya diphedi tše kotsi.
Kgato e nngwe ke yeo e bitšwago ‘ozonation’, moo gase ya ‘ozone’ e thušago go fokotša ditwatši (dipaketheria) le diphedi tše dingwe tše nnyane tša kotsi tšeo di lego ka meetseng. Ka morago ga magato ao, meetse a a lekwa go kgonthišiša gore na a fihlelela maemo ao a nyakegago pele a tšhelwa ka mapotlelong le go rekišwa.
Tshepedišo ye e bontšha gore saense le theknolotši di na le tema e kgolo go direng gore batho ba hwetše meetse ao a hlwekilego a go bolokega. Batho ba swanetše go šireletša meetse ka go se lahlele ditšhila dinokeng le mafelong a mangwe go boloka maphelo a batho.
Mamonate Spuru, yo e lego mošomi wa Oasis Water Polokwane, o eletša batho ka bohlokwa bja go nwa meetse ao a hlwekilego. O re go nwa meetse ao a lekanego le ao a hlwekilego go bohlokwa mebeleng ya batho gomme go ka thuša gore matlalo a batho a phadime le go dira gore batho ba lebelelege ba le botse ba phadima. Ka gona, batho ba swanetše go nwa meetse ao a hlwekilego ka mehla ka ge meetse e le karolo e bohlokwa ya maphelo a batho.



