MMEGI WA SEIPONE
GAMADIBA, Mashashane: “Nna ke mohlahlobi yo a tshwenyegilego ka lebaka la sekolo se sa Sekontari sa Dr MJ Madiba. Ke a bona letšatši ka letšatši difatanaga di rwala barutwana metseng ya gaborena go ba iša dikolong tše dingwe. Ka ntle le gore taba ye e hlolela batswadi ditshenyegelo tša ditšhelete tša dinamelwa le mathata a mangwe a ditsela, taba ye e hlola gape potšišo ya go re na kgane thuto e dula kae. Ge barutwana ba tloga kgauswi le magae a gabobona mme ba latelela dikolo tša kgole, na se se ra gore thuto ga e gona dikolong tša gabobona mme e dula dikolong tšeo ba yago go tšona?” gwa botšiša Molaodi wa Sediko sa Maune, Ngk. Johannes Motola, ge a bolela nakong ya moletlo wa mengwaga ye 50 ya Sekolo sa Sekontari sa Dr MJ Madiba ka Labohlano la 02 Diphalane 2026.
Motola o re Hlogo ya Sekolo, Ngk. Johanna Rapetsoa le barutiši ba gagwe ba šoma ka tlase ga maemo a boima sekolong sa Dr MJ Madiba. O re go se swane le dikolo tše dintši, Sekolo sa Dr MJ Madiba se swanetše go bonwa bjalo ka lefelo la bohwa ka lebaka la motho yo se reeletšwego ka yena – Dr MJ Madiba. Ka lebaka la karolo yeo e bapetšwego ke Dr MJ Madiba bjalo ka lešupatsela go merero ya thuto le bongwadi bja dipuku, sekolo seo se reeletšwego ka yena se swanelwa ke serithi le tlhompho bjalo ka leswao la go hlompha yena. Motola o re sekolo sa Dr MJ Madiba se swanetše go boetšwa maemong a sona a serithi le boikgantšho fao batswadi ba thabelago go romela bana ba bona go sona.

“Hlogo ya sekolo le barutiši ba gago, re a le bona gore le a kalokana ka tlase ga maemo a boima – re tla tšwela pele go le thekga. Fela ke rata go dira boipiletšo go barutwana ba maloba le maabane ba sekolo se ke re, hle bowang gae le beeletše go sekolo se. Sekolo se se tšweleditše dingaka, dientšineere, boramelao, barutiši, baoki, maphodisa, balaodi ba dikhamphani, borakgwebo le ba bangwe bao ba ka kgonago go thekga sekolo se. Sekolo se ga se nyake thekgo ya tšhelete feela – ditlabakelo tša thuto, go kaonafatša meago le mabala, le thekgo ya mantšu le dikeletšo di tla thuša sekolo go tsoga. Hle, bowang ka bokgoni le ditlabakelo tša lena go aga sekolo le go se boetša go serithi sa sona. A re se ketekeng bophelo le bohwa bja Dr MJ Madiba ka go bolela ka melomo feela – a re mo ketekeng ka go tliša diphetogo maphelong a batho le a setšhaba,” Mohlahlobi Motola a realo ka maikutlo.
Moletlo wo o be o tsenetšwe ke maloko a lapa la Dr MJ Madiba, barutiši ba bjale le ba kgale, barutwana ba bjale le ba kgale le maloko a setšhaba.



