SEKHUKHUNE: Great North Transport (GNT) e ipiletša gore bao ba šomago ka dinamelwa tša setšhaba ba šomišane gabotse Seleteng sa Sekhukhune ka morago ga dipego tša gore dipese tša yona di thibetšwe go šoma ditseleng tše dingwe tšeo di abetšwego khamphane ye.
Kgopelo ye e tla ka nako yeo GNT e thomago go diriša dipese tše ntshwa seleteng, ka maikemišetšo a go kaonafatša polokego, go tshepagala le bokgoni bja ditirelo tša banamedi bao ba yago mešomong, dikolong, dikgwebong le mafelong a mangwe. GNT e re ditšhitišo tšeo di amago mošomo wa yona, ga di kgome khamphane feela eupša di ama le banamedi bao ba ithekgilego ka ditirelo tša yona letšatši le lengwe le le lengwe.
Mmoleledi wa GNT, Leo Gama, o re go šitišwa ga ditirelo tša dipese tšeo di rulagantšwego, go ka ba le ditlamorago tše šoro go bašomi, barutwana, dikgwebo le ditšhaba tšeo di dirišago dinamelwa tša bohle. O re khamphane e nyaka go rarolla ditlhotlo tšeo ka dipoledišano, go ena le go lwa goba go thulana le bao ba amegago.
“GNT e kgopela khutšo, tirišano le dipoledišano tša go aga magareng ga mahlakore ka moka. Go šoma mmogo go ka thuša go netefatša gore banamedi ba Sekhukhune ba tšwela pele go hwetša ditirelo tša dinamelwa tšeo ba di hlokago,” a realo.
O re ba ipiletša go mekgatlo ya dithekisi, beng ba dithekisi le bakgathatema ba bangwe ba dinamelwa tša setšhaba gore ba šomišane le GNT le go boledišana le balaodi ba maleba go hwetša ditharollo tša go ya go ile tša dikgakgano tšeo di amago ditirelo tša dinamelwa.
“Re hlompha karolo ya intasteri ya dithekisi setšhabeng gomme re ikemišeditše go netefatša gore bašomi ba dinamelwa bao ba fapafapanego ba phedišana ka khutšo. Dipese tša GNT di šoma ditseleng tšeo di dumeletšwego, ka fao, re kgopela bakgathatema ka moka go hlompha ditumelelano tšeo di šetšego di le gona tša go šoma ditseleng,” Gama a kgopela bjalo. O re bao ba nago le dingongorego ka mošomo wa GNT, ba swanetše go di tšweletša ka dipoledišano tša go aga, go ena le go dira dilo tšeo di ka šitišago ditirelo.



