MAMOGUDI MATEMANE
PRAKTISEER: Mo ke bolela ka bongwadi bja Sepedi le bangwadi ba sona. Phehli yeo e ba tsenetšego ke ya go laola gore ba ngwale bjang le gore na ba ngwale ka ditaba tša mohuta mang. Mongwadi wa nnete ga a kgethelwe seo a swanetšego go ngwala ka sona. Go dira bjalo e ka ba go mo amoga tokologo ya gagwe ya bongwadi. Mongwadi o swanetšwe ke go akanya le go lora. A re ge a phafoga fao torong ya gagwe, a tšee pene a e lebanye le letlakala goba a hlome menwana godimo ga khompyutha gomme a re hlatsetše tšeo a di akantšego goba tšeo a di lorilego. Ge e le sereti, a potoketše go ya ka fao a ikwago ka gona.
Taba ya go re mongwadi a ngwale diretwana di se kae gomme a ye a di nyalanye le tša ba bangwe gore ba bope puku e tee ya dikgobokanyo tša direto, ga e phele. Ke go aroša bangwadi … ke go keta ka bona diketo – ke go nyatša seo bangwadi ba lego sona. E swana le ya go re mongwadi a ngwale dikanegelokopana tša gagwe tše mmalwa, a tšame a nyaka bao a ka di nyalanyago le tša bona gore ba bope puku ya dikgoboketšo, ga se yona.
Mongwadi wa direto o swanetšwe ke go ngwala puku ya gagwe ya direto yeo e feletšego. Wa dikanegelokopana le yena a ngwale puku ya gagwe ya dikanegelokopana yeo e feletšego. Puku ga e dikwe. Le taba ya gore mongwadi a re go ngwala puku – e ka ba padi, terama goba kanegelotšhaba – ke moka a laetše phetleko ya yona, ga se yona. Sa mongwadi ke go ngwala puku, a re go e ngwala, a e gafele babadi … ke phetho, ke tuu!
Babadi e ka ba ba go balela go itloša bodutu goba babadi ba go balela go ithuta. Ba go itloša bodutu ba tlo e bala go tloga mathomong go ya mafelelong gomme ba ipshina ka ditaba. Ba go balela go ithuta ba tlo e bala, ba tšame ba fetleka mantšu le mebolelwana ya go šomišwa ka fao pukwaneng. Ba lebelela tikologo ya fao puku e ngwadilwego ntshe gotee le nako yeo e ngwadilwego ka yona. Ba fetleka le baanegwa ka botlalo go ya ka dimelo le ditlwaelo tša bona.
O ka se ngwale puku, wa re go fetša, wa e fetleka ka bowene. Wo ke moya wo o tsupologilego wona matšatši a. Ke le mongwadi, ke thulana le wona. Ga ke thulane le diphetogo – ke thulana le diphetogo tša go hlahlatha. Ge ke fetleka puku ya ka, a ga le bone gore ke nyatša dikgopolo tša babadi? Na ke tlo tloge ke kgona go ngwala go re mo mongwadi o paletšwe goba o kgonne e le ge ke itšhupa? Na le ile la ka la e bona kae yona ye ya mohuta wo? Ge re bolela ka dilabi le phehli ka bongwading, re šupa eng ge e se tšona tše? A re itshenkeng!



