MMEGI WA SEIPONE
GAMADIBA, Mashashane: “Ka mekgwa yeo e fetago o tee, Yunibesithi ya Limpopo ke lefelo la bohwa. Go tšwa kua morago ge motho a lebelela histori ya yona, Yunibesithi ya Limpopo e be e le e nngwe ya diyunibesithi tše tharo fao bathobaso ba bego ba kgona go neelana dikgopolo maemong a thuto ya godimo. E be e le lefelo leo go lona baetapele, ditsebi bagale le bagaleadi ba bego ba tšweletšwa go lona … e le legae la dipolitiki tša tokologo. Yunibesithi ye e be e le lepatlelo leo go lona, ka tlase ga mabaka a boima, bathobaso ba bego ba kgona go akanya, go lora le go hlologela gore na yunibesithi e ka lebišwa thoko efe. Dr MJ Madiba ke yo mongwe wa baetapele bao ba bego ba šikere boikarabelo bja go bona gore na ba lebiša yunibesithi thoko efe,” gwa realo Hlogo le Motlatšamokhanselara wa Yunibesithi ya Limpopo, Ngk. Jeffrey Mabelebele, nakong ya moletlo wa go lebogiša Sekolo sa Sekontari sa Dr MJ Madiba ge se fetša nywaga e 50 ka Mokibelo wa 02 Diphalane 2026.
“Yunibesithi ya Limpopo e hlomilwe e le University College of the North ka 1959. Ka 1960, go ile gwa hlongwa Komitikeletši ya go hlahla ka fao yunibesithi e yago go šoma ka gona. Dr MJ Madiba e be e le karolo ya Komitikeletši ye. Ka 1968, Dr MJ Madiba o bile Mokhanselara wa mathomo wa mothomoso wa yunibesithi ye … o bile lešupatsela. Ge motho a sekaseka ditaba tše, o tla lemoga gore ka ntle le manganga, histori ya Yunibesithi ya Limpopo e logagane le bophelo bja Dr MJ Madiba ka mokgwa wo motho a ka se kgonego go di aroganya. Mo nakong ye, yunibesithi e maemong ao e lego go wona ka lebaka la motheo wo e hlomilwego godimo ga wona … motheo wo Dr MJ Madiba a bilego mohlomi le moagi wa wona. Bjalo ka karolo ya go hlompha bohwa bja mokgalabje yo, re ikgantšha ka sekolo sa Dr MJ Madiba seo se reeletšwego ka yena. Mola re se lebogiša ka go fetša nywaga e 50, re dumela sekolo se katlego le tšwelopele ge se swarane le morero go ya pele go bokamoso. “Bjalo ka lefelo la bohwa, go na le ditaba tše dintši tšeo di sa tsebegego ka Yunibesithi ya Limpopo. Re hlomile projeke yeo nepo ya yona e lego go dira diphatišišo le go ngwalolla histori ya yunibesithi. Lefapa la Thuto, ka tirišano le Kgoro ya Sesotho sa leboa / Sepedi, ke lona le tlago eta pele projeke ye. Bjalo ka karolo ya diphatišišo, yunibesithi e tla dira dipeakanyo le ba lapa la Dr MJ Madiba go sekaseka ka botlalo seabe sa mokgalabje yo go bophelo bja yunibesithi. Re duma go bona seswantšho sa go seka sa leeto leo yunibesithi e le sepetšego. Nepokgolo ya rena ke go bona Yunibesithi ya Limpopo e goeletšwa bjalo ka lefelo la serithi la bohwa leo le swanelwago ke go šireletšwa, go hlompšha le go phagamišwa,” Mabelebele a realo ge a ruma.
