MMEGI WA SEIPONE
POLOKWANE: “Ge re tswalela Khonferense ye ya Dipeeletšo, ntumeleleng ke thome ka go leboga Motlatšapresitente, Mna Paul Mashatile, ka go re hlompha ka go ba gona ga gagwe, ka go bula khonferense ye semmušo le go hloma motheo wa go kgwahla go maitekelo a rena ao a tšwelago pele a go fetola dipolelo tša boipofo go ba ekonomi ya go swarega, ya go bonala le kgatelopele go magagaborena. Gape re rata go leboga babeeletši ka moka, baetapele ba kgwebo, badirišani go tlhabollo le bakgathatema bao ba tšerego karolo khonferenseng ye. Dipoledišano tša lena di laeditše gore Limpopo le na le dibaka tšeo di swanetšego go šalwa morago le bokgoni bja go ba le seabe se segolwane go kgolo ya ekonomi ya Afrika Borwa,” gwa realo Tonakgolo, Ngk. Phophi Ramathuba, nakong ya ge a tswalela semmušo Khonferense ya Dipeetšo ya 2026 ka Lbone la 15 Diphalane (Oktoboro) 2026 hotelengtsoko ka ntlenyana ga Polokwane.
Tonakgolo o re mošomo wa tlhabollo ga o fele ka dipolelo tša boitlemo – gabotse dipolelo tša boitlemo ke fao mošomo wa nnete o thomago gona. Šedi bjale e swanetše go išwa go phethagatšo ya boitlemo bjo bo dirilwego ka diprojeke tšeo di phethagatšwago, difaporiki le meepo tšeo di tsenywago tirišong, mafarahlahla ao a agwago, dikgwebo tšeo di golago le mešomo yeo e hlolelwago setšhaba. O re katlego ya khonferense ga se ya swanela go elwa ka bogolo bja ditšhelete tša boitlemo eupša ka katlego yeo e bonalago setšhabeng. Khonferense ya lenyaga e humane boitlemo bja dipeeletšo bja R138.43 bilione yeo e lego boitlemo bja tšhelete yeo e fetago ya khonferense ya go feta.
Tonakgolo o re mmušo wa profense o amogela boitlemo eupša o a lemoga gore mohola wa dipeeletšo o letše go phethagatšo ya boitlemo. Ga go thuše selo go keteka boitlemo bjo bo dirwago ngwaga ka ngwaga mola diphetogo tšeo di sepelelanago le boitlemo bjoo di sa bonale maphelong a batho. Boikarabelo bja mmušo ke go bona gore boitlemo bjoo bo fetoga go ba ditiragalo tša ekonomi, kgolo yeo e oketšegago, dikgwebo tše diswa le mešomo ya nako e telele. Ramathuba o re bjalo ka profense, tumo ya bona ke go bona 30% ya boitlemo bjo bo dirilwego e phethagatšwa mo nakong ya ngwaga o tee. 30% ya R138.43 bilione ya boitlemo bjo bo dirilwego khonferenseng ya lenyaga ke R41.53 bilione. Ye ke kelo ya phethagatšo yeo profense e swanetšego go katanela go e fihlelela. “Re swanetše go nagana ka moswa yo a nyakanago le mošomo wa gagwe wa mathomo, lapa leo le holofetšego boiphedišo bjo bokaone, rakgwebo yo a thomago yo a nyakago bareki le ditšhaba tša magaeng tšeo di nyakago dibaka kgauswi le fao di dulago. Go batho ba, katlego ya khonferense e ka se laolwe ke dipolelo goba dipalo tšeo di laeditšwego khonferenseng. Go bona, katlego e tla laolwa ke dibaka tšeo di bago gona, go gola ga dikgwebo, gore na bašomi ba humana bokgoni bjo boswa le gore na maphelo a a kaonafala na. Ge re tloga mo khonferenseng, a re tlogeng ka kwešišo ya go swana ya go re kelo ya katlego ya rena ga se boitlemo bjo bo dirilwego eupša kgatelopele yeo magagaborena a e bonago,” Tonakgolo a ruma ka go realo.
