GAMARABA, Kalkspruit: Mošate wa Maraba o swere meketeko ya wona ya Letšatši la Bohwa mo GaMaraba ka Labohlano, 25 Lewedi 2026, letšatši ka morago ga meketeko ya bosetšhaba. Badudi le baetapele ba ile ba iponagatša go keteka Letšatši la Bohwa fao ba ilego ba ipshina ka mmino, meaparo le dijo tšeo di bego di le fao.
Mna Lesetja Ledwaba, Ntona ya motse wa Lepotlako e bile e le leloko la khuduthamaga ya Mošate, o hlalositše gore le ge diaparo, dinako, mmino le dijo ka moka di le bohlokwa, histori ya setšhaba sa Maraba e bohlokwa go feta tšohle. O nyaka gore badudi ka kakaretšo ba ithute ka dikgoši tša bona.
“Komiti ya go beakanya moletlo wo, e rera go godiša tiragalo ye ngwaga ka ngwaga. E bile re hlohleletša badudi gore ba tšeye karolo. Bafsa ba swanelwa ke go lota setšo sa bona ge ešita le go se tšwetša pele ka boikgantšho.
“Setšhaba se hloka kgopotšo ya ka mehla ya go lota bohwa bja sona. Setšhaba se swanetše go ithuta go latela ditiro tše dibotse le go hlompha baetapele bohle, go sa kgathale boemo bja bona. Batho ba swanetše go tseba dikgoro tša gabobona gore histori le setšo di be le lefelo maphelong a bona gore meloko ya ka moso e tsebe boetapele bjo bo fetilego,” gwa realo Ledwaba.
Bohwa bja rena ga se feela polelo goba mekgwa ya kgale eupša ke lesedi leo le re laetšago moo re tšwago gona le go bopa tsela ya ka moso ya bana ba rena. Go tseba mo motho a tšwago, go tsoša boikgantšho bja nnete le lethabo ka pelong ya gagwe. Ge setšhaba se sa tsebe histori ya sona, se swana le mohlare wo o se nago medu. Ka gona, meketeko ya mohuta wo e re gopotša gore re boloke, re hlomphe mme re fetišetše bohwa bja rena melokong yeo e tlago ka boikgantšho le ka boikokobetšo.
