SEKHUKHUNE: Badudi ba Sekhukhune ba tla hwetša gape phihlelelo ya ditirelo tša dipase tša mmušo ka morago ga dikgwedi tše mmalwa ba šomiša dinamelwa tše dingwe tšeo di bitšago tšhelete e ntši. Great North Transport (GNT) e tsebišitše gore ditsela ka moka tša tikologo ya Sekhukhune di tla šoma ka botlalo go tloga ka Mošupologo wa 14 Lewedi 2026, ka morago ga go lokišwa le go bušetšwa tirelong ga dipase tše mmalwa le go hwetšwa ga dikoloi tše diswa.
Go boela ga dipase go lebeletšwe go fokotša bothata bja dinamelwa go badudi bao ba ithekgilego ka dinamelwa tša setšhaba go ya mošomong, dikolong le ditirelong tše dingwe tša bohlokwa. Modudi, Tshwarelo Masekoameng, o re go se be gona ga dipase tša GNT go mo gapeleditše go šomiša tšhelete e ntši dinamelweng tše dingwe.
“Ke thabile gore dipase di boile gobane bjale ke tla kgona go boloka tšhelete. Ke holofela gore ba ka se oketše ditefelo tša bona ka gore batho ba bantši ba ithekgile ka tšona,” a realo.
Go bao ba tsomago mešomo, go bowa ga dipase go tla thuša go kaonafatša phihlelelo ya menyetla ya mešomo ka ntle ga mafelo a bona.
Koketso Marutla o re: “Bjale ke tla kgona go ya toropong go iša di-CV le go nyaka mešomo. Ke kgale ke palelwa ka lebaka la dinamelwa tša go nyaka ditefelo tša godimo.”
Mohlankedi yo a šomago bjalo ka CEO wa GNT, Charles Mashele, o re go tsošološwa ga ditirelo ke phetogo ye bohlokwa go khamphani.
“Go tsošološwa ga ditirelo tša rena ditseleng ka moka kua Sekhukhune ke sešupo sa gore GNT e fetile nakong ye thata. Khamphani e tsošološa dipase le tshepo ya badudi ka morago ga mathata a go šoma. Ga re tsošološe dipase feela. Re tsošološa le tshepo ya banamedi ba rena le ditšhaba tšeo di ithekgilego ka GNT letšatši le lengwe le le lengwe,” Mashela a realo.
O re GNT e ikemišeditše go fana ka dinamelwa tša setšhaba tšeo di fihlelelwago gabonolo le go thekga maphelo a badudi ba Limpopo. Tsošološo ye ke karolo ya leano la go tsošološa khamphani. GNT e letetšwe go fihlelela 100% ya ditsela tšeo di šomago ka botlalo go ralala Limpopo go tloga ka la Mošupologo, 21 Lewedi.
Mashele o kgopetše badudi go šireletša dipase kgahlanong le tshenyo le bosenyi le go bega bao ba lekago go di senya.
