Sephetho sa Kgoro ya Bosetšhaba ya Matlotlo sa go emiša ditefelo tša kabo ya ditekanyetšo (equitable share) tša Mosegamanye go dimasepala tše hlano tša Limpopo, se tsošitše matshwenyego go mekgatlo ya dipolitiki. Dimasepala tšeo di amegago ke wa selete sa Mopani le ya selegae ya Musina, Thabazimbi, Modimolle-Mookgophong le Fetakgomo- Tubatse, yeo e lego karolo ya dimasepala tše 69 tšeo di hlaotšwego ka lebaka la taolo e mpe ya ditšhelete le go se latele molao wa tshepetšo le tšhomišo ya tšhelete tša masepala.
Equitable share ke tšhelete ye e fiwago dimasepala ke mmušo wa naga go thuša ka ditirelo tša motheo bjalo ka meetse, mohlagase, kelelatšhila le go tloša matlakala. E bohlokwa kudu go dimasepala tša magaeng tšeo di sa kgonego go ikgobokeletša tšhelete ka botlalo. Le ge go le bjalo, go emiša tšhelete go na le ditlamorago tša ka pejana ka ge dimasepala di ithekgile ka tšhelete ye go lefela bašomi, go hlokomela meago le go netefatša ditirelo tšeo di sa kgaotšego.
Seboledi sa mokgatlo wa Democratic Alliance (DA) Limpopo, Jacques Smalle o re se se bontšha mathata a magolo a taolo profenseng. “Badudi ga ba swanela go tšwela pele ba otlwa ka lebaka la taolo e mpe ya ditšhelete ke dimasepala,” a realo.
Build One South Africa (BOSA) Limpopo le yona e boletše gore se ke bohlatse bja go wa ga taolo ya ditšhelete. Timothy Maluleke o lemošitše ka maemo a Mopani, a re sekoloto sa go feta R302 milione go Lepelle Northern Water le R384 milione go Kgoro ya Meetse gammogo le tekanyetšo ya ya go se thekgwe (unfunded) ya go lekana R2.4 bilione, se bea ditirelo kotsing. Masepala wa selete wa Mopani o re masepala o sa eme gabotse ditšheleteng mola mmoleledi Mildred Sibasa a re ba šoma le Kgoro ya Ditšhelete go rarolla bothata bjo.
South African Local Government Assocoation (SALGA) e lemošitše gore le ge go laola go le bohlokwa, ditlamorago go kabo ya ditirelo di swanetše go elwa tlhoko.
Tona ya Kgoro ya Ditšhelete ya Bosetšhaba, Enoch Godongwana, o šireleditše sephetho seo ka go re ga se kotlo eupša ke mokgwa wa go tiiša taolo. “Re nyaka go netefatša gore tšhelete e šoma go hola badudi,” a realo.
