PHAGAMENG, Modimolle: Lapa la gaMasalesa lekheišeneng la Phagameng, Extension 12
kua Modimolle le wele ka mahlong. Se se tlile ka morago ga gore Mme Elisa Masalesa le
bana ba gagwe ba bararo ba lahlegelwe ke maphelo ka morago ga gore mokhukhu wa bona o
swe mollong o mošoro nakong ya ge ba be ba robetše. Ka madimabe, ga go na yo a
phologilego masetlapelong ao a bošego bja Mošupologo, 13 Mosegamanye 2026.
Meyara wa Masepala wa Selegae wa Modimollle, Cllr Anna Mboweni, o ile a dira gore go
hlongwe komiti ya bakgathatema go thekga lapa leo le lego mahlokong. Meyara o etetše lapa
leo lekga la bobedi ka Laboraro la 15 Mosegamanye 2026 go homotša le go thekga lapa leo.
Nakong yeo ya ketelo, Meyara o ile a laetša ditebogo tša gagwe go bakgathatema bao ba
swaranego ka matsogo go thekga lapa mo nakong e boima. O lebogile mekgatlo ya dithekisi,
beng ba dimošare, borakgwebo, badirišane ba bangwe le maloko a setšhaba bao ba
šomišanago le masepala go kgonthišetša gore bahu ba humana poloko ya serithi.
Go beakanya thekgo, Mboweni o kgonagaditše go hlongwa ga komiti yeo e akaretšago
masepala, baemedi ba setšhaba le bakgathatema ba bangwe go beakanya tirelo ya poloko le
ditlabakelo tšeo di nyakegago. Meyara Mboweni, Mosepikara, Cllr Sinah Langa,
Sefepisegolo, Cllr Mokgadi Dayimane, Cllr Jack Shokane le dikemedi tša bakgathatema ba
go fapana ba neetše lapa la gaMasalesa ditlabakelo tša poloko. Masepala o be o ikemišeditše
go fa lapa le thekgo yeo e nyakegago mo nakong e bohloko.
Poloko ya maloko a lapa le e phethilwe ka Mokibelo wa 18 Mosegamanye 2026 fao tirelo e
swaretšwego sekolong sa Lekker Breek mo Phagameng ka 7: 00. Modiro wo o kgonagetše ka
lebaka la botho bjo bo laeditšwego ke masepala le maloko a go fapana a setšhaba ao a ilego a
ipopa ngatana e tee.
