SEKHUKHUNE: Batho ba lesomenne ba hlokofetše mola ba bangwe ba tshela ba gobetše
dikotsing tše pedi tša mebileng tšeo di fapanego ka Mokibelo, 18 Mosegamanye 2026
seleteng sa Sekhukhune. Kotsi ya mathomo e diregile tseleng ya R555 magareng ga Stoffberg
le Rossenekal ka gare ga masepaleng wa selegae wa Elias Motsoaledi. E amile koloi ya
mohuta wa Volkswagen Polo, thekisi le theraka.
Go ya ka kgoro ya Dinamelwa le Polokego ya Setšhaba, batho ba bahlano ba hlokofetše
lefelong la tiragalo. Kgoro e boletše gore go otlela bošaedi go ka se beelwe ka thoko bjalo ka
lebaka la go hlola kotsi le ge lebaka la nnete la kotsi le sa dutše le nyakišišwa. Kotsing ya
bobedi yeo e diregilego tseleng ya D4370 magareng ga Phokwane le Mamphogo masepaleng
wa selegae wa Makhuduthamaga, koloi ya Volkswagen Polo e thulane le Toyota Tazz.
Dinyakišišo tša mathomo di laetša gore lebelo le legolo le ka ba le bile le seabe kotsing ye.
Batho ba bane bao ba bego ba le ka gare ga Polo le ba bahlano bao ba bego ba le ka gare ga
Toyota Tazz ba hlokofetše gomme palo ya bao ba hlokofetšego dikotsing tše pedi e fihla go
ba 14. Batho ba tshela ba gobetše dikotsing tše pedi tše gomme ba išitšwe dipetleleng tša
kgauswi go hwetša kalafo.
Molekgotlaphethiši wa Kgoro ya Dinamelwa le Polokego ya Setšhaba, Mdi Violet Mathye o
hlalošitše ditiragalo tše bjalo ka masetlapelo go selete.
“Leru le leso le aparetše selete sa Sekhukhune gomme legatong la Kgoro le batho ba
Limpopo, ke rata go romela mantšu a tlhobošo go malapa a bao ba lahlegetšwego ke baratiwa
ba bona le go lakaletša bao ba gobetšego go fola ka pela,” gwa realo Mathye.
O hlohleleditše baotledi go obamela melao ya tsela, go efoga go sepela ka lebelo la godimo le
go khutša ge ba le maetong a matelele.
“Balaodi ba sephethephethe ba tla romelwa mafelong ao a tsebjago ka dikotsi go hlokomela
maemo mola dinyakišišo ka dikotsi tše pedi di tšwela pele,” a realo.
Mathye o re Kgoro e tla boledišana le masepala wa selete sa Sekhukhune le dimasepala tša
selegae yeo e amegilego pele ga go fana ka ditsebišo tše dingwe ka dikotsi tše.
