PALEDI,GaMothapo: LCA, yeo e emetšego Lemba Cultural Association, ke mokgatlo wa
mohlobo wa bathobaso ba Bashabi bao ba tsebegago kudu mo Afrika Borwa le dinagamabapi go
etša Zimbabwe. Mokgatlo wo o na le makala ao nepo ya wona e lego go kopanya le go matlafatša
kgokagano le setswalle sa maloko a Bashabi. Godimo ga moo, Bashabi ba tsenela dikopano tša
bona ka nepo ya go ruta baswa ba mohloko wa bona ka histori ya mohlobo wa bona gore setšo sa
bona se tielele le go tšwela pele.
Kopano ye ya go bula lekala tikologong ya Mankweng e be e tsenetšwe lefelong la boithabišo la
Fun Waters mo Moremadi Park kgauswi le Paledi Mall ka Mokibelo wa di2 Mopitlo (May) 2026.
Ishe Pandelani Mutenda (Presitente wa LCA), Ishe Hamese Seapara (Ramatlotlo wa LCA), Ishe
Mafadza Nyaweleni ( Motlatšamopresitente), Ishe Magada (Chaplain) le Ishe Matshili Fhatuwani
(Motlatšamongwaledi wa LCA) ke bagolo ba mokgatlo bao ba bego ba tlile go šegofatša moletlo.
Mohlobo wo wa Bashabi o na le maloko a mantši mo tikologong ya Mankweng. Bona ke ba
difane tšeo di akaretšago Rametsi, Malema, Thubakgale, Ragedi, Sathekge, Senwamadi,
Rapakgadi, Pakgadi, Tloubatla, Hamese, Phala, Phalakatshela, Kgatle le tše dingwe. Lekala le la
Mankweng le akaretša badudi ba metse ya Nobody, Turfloop (Mankweng), Segopye,
GaMamabolo, GaMothapo, Makotopong, Ga-Molepo le metsemabapi.
Mdi Mmakaepea Malema o kgethilwe bjalo ka modulasetulo wa lekala le leswa la Mankweng.
Yena o kgethilwe le sehlopha sa boto ya lekala yeo e tlogo swarišana gore mošomo o tšhabe
diatla. Yena o retile ebile o thabetše taba ye ya go tswalwa ga lekala la Bashabi la Mankweng.
Mmakaepea o rile, “Ye ke yona nako ya maleba … ke nako ya gore re boele re be Bashabi … re
šabiše. Re swanetše gore re buše lerato lela la bomakgolokhukhu ba rena, re swarane re be ngata e
tee. Bashabi ke batho ba go šoma, ke batho ba go rekiša, ke batho ba kgwebo ebile ke batho ba
lerato”.
Mmakaepea ke mogwadi wa dipuku tša Sesotho sa Leboa go etša puku ya go bitšwa ‘Yunibesithi
ya Mahala’. Yena ge a bolela o be a bapetša puku ya gagwe le maphelo a mabotse le thuto ya
Bashabi.
Mopresitente wa LEMBA, Ishe Pandelani Mutenda, o amogetše lekala le leswa ka matsogo a
mabedi a borutho. O bontšhitše thekgo a ba a abelana ka thuto ya histori ya mohlobo wa Bashabi.
“Mohlobo wo wa rena wa BALEMBA, ke wa Majuta, o tšwa Israele. Mohlobo wa rena o fapana
le mehlobo e mengwe ka lebaka la setšo le mekgwa ya go fapana ya tlhago ya rena. Ga re je nama
ya kolobe ebile ga re je nama ya phoofolo ya go hwa. Re ditlogolokhukhu tša Abraham, Isaka le
Jakobo. Re ba moloko wa Benjamin wa ntlo ya Jerico. Re sa swere setšo sa rena sa bogologolo sa
Baisiraele ebile re tšwela pele go se ruta bana ba rena. Re mohlobo wa kgwebišano, re tumile ka
kgwebo. Shalom”. Yena Ishe Mutenda, ge a fetša polelo ya gagwe o boletše lentšu le Shalom e
lego lentšu leo ba le šomišago go dumediša le go ruma polelo ka tlhompho ka setšo sa Bashabi.
