Maphodisa a Polokwane a butše melato ya dinyakišišo tša polao ka morago ga gore maloko a
mabedi a maphodisa a hwetšwe a hlokofetše ka ntlong motseng wa Ha-Thukhutha go la
Tshilungoma 1 kgauswi le Thohoyandou. Tiragalo ye e diregile ka Labobedi, 24 Dibokwane
2026, ka morago ga gore maphodisa a bitšwe go ya lefelong leo. A hweditše mosadi wa
mengwaga ye 45 a rapaletše ka gare ga ntlo a na le dikgobalo tše ntši tša go hlabja ka thipa.
Monna wa gagwe wa mengwaga ye 55 o hweditšwe a lekeletše marulelong a ntlo.
Mmoleledi wa maphodisa a Limpopo, Colonel Malesela Ledwaba, o re bašomi ba thušo ya
pele ba ile ba netefatša gore bobedi bo hlokofetše lefelong leo. Maphodisa a kgonthišišitše
gore banyalani bao e be e le boWarrant Officer bao ba šomago lefapeng la selegae la go
kgoboketša melato ya bosenyi (Local Criminal Record Centre) go la Thohoyandou.
“Banyakišiši ba tšwela pele go nyakišiša maemo ao a hlotšego dipolao tše. Gabjale sešupo sa
tlholego ya mahu a ga se tsebege eupša tlaišo ya ka lapeng ga se ya tlošwa lenaneong la
dinyakišišo. Banyakišiši ba latela mehlala ka moka,” gwa realo Ledwaba.
Ledwaba o re ba kgopela mang le mang yo a nago le tshedimošo go tla pele ka ge dinyakišišo
di sa tšwela pele. Gape a hlohleletša maloko a maphodisa go šomiša makala a mananeo a
thušo le thekgo ya maphelo.
Mokhomišinare wa maphodisa a profense, Thembi Hadebe, o kgadile ka bogale tiragalo ye.
“Mahu a maloko ao ke tahlegelo e kgolo go tirelo ya maphodisa le setšhaba,” a realo.
