Bosenyi ka kakaretšo profenseng ya Limpopo bo fokotšegile kotareng ya boraro ya ngwaga
wa ditšhelete wa 2025/2026. Maphodisa a re go oketšega ga melato ya polao e sa le taba yeo
e tshwenyago kudu. Ge a be a tšweletša dipalopalo tša bosenyi ka Labobedi, 23 Dibokwane
2026, Mokhomišinare wa maphodisa, Lieutenant-General Thembi Hadebe, o boletše gore
magoro a mantši a bosenyi a bontšhitše phokotšego e kgolo magareng ga kgwedi ya
Diphalane le Manthole 2025. Se se laetša khuetšo ya mešomo ya go matlafala ya maphodisa.
Go ya ka dipalopalo, bosenyi bja go ama batho bo theogile ka 11.7%, bosenyi bja seboka ka
24.4%, bosenyi bja dithoto ka 15.2% mola bosenyi bjo bongwe bjo boima bo fokotšegile ka
8.6%. Le ge go le bjalo, melato ya polao e oketšegile ka 5.9% go tloga go 203 go ya go 215 e
lego melato e 12 ye e oketšegilego ge e bapetšwa le nako ye e swanago ngwageng wo o
fetilego. Tlhahlobo ya maphodisa e hweditše gore dipolao tše dintši di tšwa ditiragalong tša
go bethwa moo bahlaselwa ba hlokofetšego mola tlhaselo ya seboka le yona e oketšegile.
“Le ge koketšego ye e tshwenya, go bohlokwa go lemoga gore bosenyi bja go ama batho ka
kakaretšo bo tšwela pele go fokotšega. Profense e tšwela pele ka maemo a yona a dipolao tša
go ba fase mo nageng,” gwa realo Hadebe.
O re melato ya bosenyi bja thobalano e theogile ka 5.8%, bohodu bjo bo šomišago maatla bo
theogile ka 20.2%, go betha ka maikemišetšo a go gobatša gwa theoga ka 15% gomme go
leka go bolaya le gona go fokotšegile ka 7.1%.
“Maiteko a tshepedišo ya molao a feletše ka go swarwa ga batho ba 180 ba swere dithunya
ntle ga molao mola dithunya tše 243 di thopilwe. Batho ba go feta 2 600 ba swerwe melatong
ya diokobatši. Maphodisa gape a swere bagononelwa ba 178 ba polao le ba 288 melatong ya
go kata.
“Masolo a kopanelo go swana le Operation Shanela le ya dihla tša meletlo di kgathile tema e
kgolo go šitiša maemo a bosenyi. Morero wa rena o dula o le bjalo, go ba gona ga maphodisa
ao a bonagalago, mešomo yeo e theilwego godimo ga tša mahlale le dikarabelo tša ka pela go
šireletša maphelo le dithoto,” a realo.
Le ge go na le tšwelopele, o lemošitše gore tlhokofatšo ya bong, melato ya seboka,
bomenetša le bohodu bjo bo lebantšwego le ba go kgopela go tšewa kgopu e sa le melato ye
bohlokwa. O kgopela setšhaba go šoma le maphodisa go thibela bosenyi le go bega ditiragalo
tša bosenyi.
