Ge esale Tona ya Thuto ya Motheo a tsebiša dipoelo ka kakaretšo maabane, go bile le maikutlo a go
fapana ao a dirilego gore re lebelele leswa dikatlego tša rena le go ipotšiša ka tšwelopele yeo re bilego
le yona. Ba bangwe ba rena ga re sa na bana ba Kreiti 12 eupša re na le kgokagano ya go tsenelela le
dipoelo tše. Katlego e nngwe le e nngwe ga e emele maitekelo a motho yo tee eupša tlhologelo ya
mohlakanelwa ya profense,” gwa realo Tonakgolo ya Limpopo, Ngk. Phophi Ramathuba, moletlong
wa go tsebiša dipoelo tša marematlou ka Labobedi la 13 Pherekgong 2026.
“Bjalo ka Taolo ya Bošupa, re rwele kholofelo ya magagaborena. Ba bantši ba be ba na le maseme ka
dikatlego tša rena tša go feta, ba šišinya gore katlego ya rena ya go kgahliša ya 85% ngwageng wa go
feta ke taba ya mahlatse feela. Fela ke eme fa mamohla go bolela ka boikgantšho gore re nameletše go
ya godimo ka go fihlelela palo ya go retega ya 86.15%. Le ge maemong a bosetšhaba re le maemong a
borobedi (seswai), re no ba feela 4, 45% ka morago ga Kwazulu-Natal yeo e lego maemong a pele,” a
realo ge a tšwela pele.
Tonakgolo o re ba bona katlego e botse yeo e fihleletšwego ke Kwazulu-Natal ka palo e kgolo ya
barutwana le ditekanyetšo tša go se makatše. Wo ke mohlala wo profense e ratago go ithuta wona le
go o ekiša gore e tšwele pele go kaonafatša dipoelo.
Tonakgolo o re ga se gore ditaba ka moka di a phadima. O re mmušo o ka se kgone go hlokomologa
selete sa Sekhukhune Borwa seo se dikilego se swere maemo a mafelelo (a mosela) mengwaga yeo e
tshelelago ya go feta. Se sengwe se swanetše go dirwa ka nepo ya go thekga dikolo tšeo di sa šomego
gabotse ka ditlabakelo. O re mmušo o tshwenywa ke go theogela tlase ga dilete tša Vhembe Bohlabela
le Capricorn Borwa. Go swanetše go nyakišišwa mabaka ao a hlolago poelomorago mme go tliwe ka
leano la go šogana le mathata a dilete. O re kaonafalo e nyaka maitekelo a bohle fao kgoro e nngwe le
e nngwe e lemogago seabe sa yona go thekga morero wa thuto le Kgoro ya Thuto ka kakaretšo. O re
thuto ke boikarabelo bja setšhaba gomme e tšwela pele gabotse ge makala ka moka a setšhaba a
bapala karolo ya wona go kaonafatša barutwana le thuto.
Tonakgolo o re bjalo ka mma yo a lebeletšego ngwana wa gagwe ge a gola, o keteka kgatelopele ya
dilete tše bjalo ka Sekhukhune Bohlabela yeo e tlogilego maemong a borobong go ya go a bohlano le
Capricorn Leboa yeo e atlegilego ka go tloga go maemo a botshelela go ya go a bobedi. O retile
sedikothuto sa Mogalakwena ka go ba sediko se sekaonekaone mo profenseng.
“Ge ke ruma, mamohla re keteka tšwelopele, re dumela gore mapheko a gona gomme re loga maano a
bokamoso bjoo go bjona morutwana yo mongwe le yo mongwe mo Limpopo a ka kgonago go
fihlelela tše dikaonekaone tšeo a kago ba tšona. Mmogo re ka kgona go hlola tikologo yeo go yona
thuto e hlompšago, e thekgwago le go atlega. A re ipofeng go ageng bokamoso bja barutwana ba rena
go kgonthišetša gore rena, bjalo ka Limpopo, re ikhumana re le gare ga dikonokono tša baetapele ba
thuto. Mmogo re ka kgona mme re ya go atlega,” Tonakgolo a realo.
