POLOKWANE: Tonakgolo ya Limpopo, Ngk. Phophi Ramathuba, o amogetše pego ya
dipoelo tša pego ya dinyakišišo mabapi le diphošo tša peakanyo ya dihlopha tšeo di ilego tša
šulafalelwa ke leeto la bona nakong ya diphadišano tša dipapadi tša bosetšhaba tša dikolo tša
2025 tšeo di swerwego Bloemfontein, Free State, go thoma ka di2 go fihla ka di5 Moranang
moo ba bangwe ba barutwana ba ilego ba hloka marobalo le dijo mme ba gapeletšega go
robala ka gare ga dinamelwa tša bona.
Mathata a a hweditše kgalemo e ntši go tšwa go batswadi le barutwana mme se sa dira gore
ba bangwe ba bona ba ikgogele morago go diphadišano tšeo. Ka morago ga dingongorego,
Tonakgolo Ramathuba o ile a laela gore go dirwe dinyakišišo go utulla gore ke bomang bao
ba paletšwego ke boikarabelo bja bona bja go šireletša bana.
Pego yeo e fihlišitšwego ke Molekgotlaphethiši wa Kgoro ya Dipapadi, Bokgabo le Setšo,
Jerry Maseko, e utulotše go se šome gabotse ga taolo gammogo le dithulano le kgonagalo ya
go šomišana ka tsela yeo e sa lokago magareng ga bašomi le baabi ba ditirelo. Ramathuba o
re dipoelo tšeo di kgopiša kudu gomme di bontšha mathata a magolo ao a swanetšego go
rarollwa go tiiša tshireletšo ya bana ba profense.
“Re ikemišeditše go buša morago botshepegi taolong ya dipapadi tša rena. Kgoro e šetše e
thomile go phethagatša ditšhišinyo tša pego, go akaretša go otla bao ba hweditšwego ba le
molato, go buša morago tšhelete yeo e sentšwego gammogo le go tšea dikgato tša molao ge
go nyakega. Re nyaka potego, bokgoni, poetšo le ponagatšo ya boikarabelo ge go šomišwa
methopo ya tšhelete ya setšhaba,” gwa realo Ramathuba.
O gateletše gape gore bašomi ka moka bao ba amegago ba ile go hwetša sebaka sa go
ikarabela ka ditiro tša bona. O re kantoro ya gagwe e tla tšwela pele go šireletša maemo a
pušo le go netefatša gore diphošo tše ga di direge gape. “Dikgato tša go phethagatša
ditšhišinyo tša pego di šetše di phethagatšwa,” a realo.
