POLOKWANE: Lepelle Northern Water e tsenyeleditšwe ka gare ga dinyakišišo tšeo di
katološitšwego tša bomenetša ka morago ga ge Presidente Cyril Ramaphosa a saenne
kgoeletšo 287 ya 2025 yeo e dumelelago Special Investigating Unit (SIU) go oketša
dinyakišišo tša yona go Kgoro ya Meetse le Kelelatšhila.
Kgoeletšo ye e oketša mošomo wa taelo ya pele, kgoeletšo R164 ya 2024 gore e akaretše
morero wa kgoro wa “Drop the Block” le phethagatšo ya wona ke Lepelle Northern Water,
gammogo le baabi ba ditirelo bao ba tswalanywago le lenaneo leo. Dinyakišišo tša SIU bjale
di tla akaretša nako ya mengwaga ye lesome go tloga ka di1 Pherekgong 2015 go fihla ka di
12 Lewedi 2025. Pele, dinyakišišo di be di lebeletše Kgoro feela.
SIU e tla nyakišiša ditatofatšo tša tšhelete yeo e sa dumelelwago, ye e šomišitšwego bošaedi,
go senyega ga tšhelete ntle le mohola gammogo le maitshwaro ao a sa dumelelwago ao a
dirilwego ke bašomi, baabi ba ditirelo le mekgatlo yeo e ka šitišago mmušo.
Mmoleledi wa SIU, Kaizer Kganyago, o re ba tla boela ba hlahloba ge eba go bile le
tšhomišo goba kabo ya tšhelete ya setšhaba yeo e sa dumelelwago.
“Gape, go feta go ntšha phatlalatša ga maatla a go se laolege gabotse, bomenetša, boradia le
ditiragalo tša bofora. SIU e tla hlatha mafokodi a Kgoro gomme ya dira ditšhitšhinyo tša
tshepedišo go thibela tahlegelo ya ditšhelete ka moso,” a realo.
Go ya ka molao wa SIU le Special Tribunals Act wa 1996, SIU e swanetše go fetiša bohlatse
bjo bo bontšhago bosenyi go National Prosecuting Authority (NPA).
“SIU e na le maatla a go tšeya magato a molao go Kgorokgolo ya tsheko goba Special
Tribunal go buša tšhelete go mmušo yeo e lahlegilego ka lebaka la bomenetša le bofora,” gwa
realo Kganyago.
