SEPHAKU: Badudi ba motse wa Sephaku kgauswi le Groblersdaal ba ikwa ba lahlilwe ka ge
ditsela tša mobu di fetogile melete e megolo moo batho ba ka emang ka gare ga yona. Ditsela
tšeo di bego di sepelega gabotse ga se tša hlokomelwa mengwaga ye e fetago lesome gomme
bjale leeto ditseleng tšeo di fetogile kotsi goba la se kgonege.
Badudi ba motse wo o fetago malapa a 800 ba re difatanaga tša bohle le tša maphelo di a
senyega mme tša go tliša dithoto tšeo ba di rekilego di gana go tsena motseng wa bona.
Barutwana ba swanela go sepela ka tlhokomelo ge ba feta meleteng yeo mola batšofe bao ba
yago mafelong a maphelo le bona ba sa kgone go fihla.
“Ge pula e nele, ga go na yo a sepelago. Barutwana ga ba ye dikolong le bašomi ba palelwa
ke go fihla mešomong,” gwa realo moetapele wa setšhaba, Thobejane Kgaphola.
O re maemong a tšhoganetšo, malapa a lahlegelwa ke maloko a wona ka ge dinamelwa tša
tshoganetšo di palelwa ke go tsena. “Ge go na le lehu, re swanelwa ke go rwala mohu ka
matsogo gomme batšofe ba hlaselwa ke baswa ka ge ba tseba gore maphodisa a tšeya nako go
fihla,” a realo.
Kgaphola o re ba išitše mathata a bona go masepala wa Elias Motsoaledi eupša ga go direge
selo. Moemedi wa DA, Nico Pienaar, o re ditsela tšeo di fetogile melete yeo e lego kotsi
gomme o tla iša taba ye go Tona ya Dinamelwa.
Mmoleledi wa mmasepala, Simon Makua, o netefaditše gore ba a tseba ka seemo sa badudi
ba Sephaku.
“Lenaneo la go tsošološa ditsela le šetše le thomile. Sephaku se akareditšwe ka gare go
lenaneo la ditšhelete la masepala la mengwaga e mehlano eupša re itshepetše kudu ka thušo
ya sekhwama sa meago ya masepala,”a realo. Go baagi, melete yeo ke sešupo sa letšatši le
letšatši sa go hlokomologwa ke mmušo.
