MOPANI: Tau ya poo yeo e bolailego diruiwa kgauswi le mollwane wa Giyani–Phalaborwa
mathomong a kgwedi ye e hweditšwe gomme ya išwa lešokeng la diphoofolo la Northern
Kruger National Park. Kgoro ya Tlhabollo ya Ekonomi, Tikologo le Boeti mo Limpopo
gammogo le SANParks le Endangered Wildlife Trust (EWT) di tšwele lesolo la go tsomana
le tau ye morago ga gore e bolaye diruiwa ka Labobedi, 16 le Sontaga, 21 Lewedi 2025.
Molekgotlaphethiši wa Kgoro, Tshitereke Matibe, o re lesolo leo e be e le go šireletša
setšhaba gammogo le tau yeo. “Bahlokomedi ba diphoofolo ba rena le batšeyakarolo ba
šomile ka maatla go šireletša setšhaba sa rena le bohwa bja diphoofolo tša naga,” a realo.
Matibe o hlohleleditše badudi bao ba dulago kgauswi le mašoka a diphoofolo gore ba se ke
ba sega goba ba senya legora ka ge seo se oketša kotsi ya kgohlano magareng ga batho le
diphoofolo.
Balaodi ba netefaditše gore go na le ditau tše pedi tše dingwe ka Mtimkulu Nature Reserve
kgauswi le Giyani. Ga se tša tsena mafelong a setšhaba goba go bolaya diruiwa eupša maano
a gore di hwetšwe gomme di išwe Kruger a a kgatlampana.
Matibe o re mmušo o tla tšwela pele go lekalekanya tšhireletšo ya setšhaba le polokego ya
diphoofolo. O rile: “Go šutišwa ga tau ye go bontšha gore ge re šoma mmogo re ka šireletša
maphelo, mešomo ya rena le bohlokwa bja diphedi tša naga tšeo di dirago Limpopo letlotlo la
lefase leo le gokago baeti.”
