MMEGI WA SEIPONE
LEBOWAKGOMO: Ka Mokibelo wa 23 Phato 2025, batšofadi ba Lebowakgomo ba hlwele
ba ipshina ka boitšhidullo lefelong la Patong ka gare ga motse. Modiro o thomile pele ka go
tšeya leeto la dikhilomethara tše nne (4) tša go sepelela boipshino. Le ge palo ya bakgalabje e
be e le ya tlasana, bontši bja batšeakarolo e be e le baswarathipakabogaleng bao ba bego ba
feletše ka diaparo tša boitšhidullo. Le ge go be go fiša, seo ga se sa thibela ditiragalo go
tšwela pele.
“Kgoro ya Dipapadi, Bokgabo le Setšo e bonwa bjalo ka kgoro yeo e tšewago go ba ‘E
Nngwe ya tšona Dikgoro Tšeo’ (by the way Departments). Le ge Kgoro ye e na le merero e
mmalwa yeo e lebanego nayo, e fiwa tšhelete e nnyane kudu. Re tseleng ya go fetola maemo
a le go dira gore Kgoro e be le mašeleng a go tsebalega go e kgontšha go phethagatša
boikarabelo bja yona ka tshwanelo. Mo nakong ye, re dira seo re ka se kgonago ka seo re
nago le sona,” gwa realo Molekgotlaphethiši wa Dipapadi, Bokgabo le Setšo, Mna Funani
Maseko, ge a bolela le batšofadi ba Lebowakgomo.
“Bjo bongwe bjo e lego boikarabelo thwii bja Kgoro ya gešo ke go tliša botee le go
kgohlaganya setšhaba (Social cohesion). Re bona dipapadi bjalo ka mokgwa o mongwe wa
go tliša botee setšhabeng. Afrika Borwa e na le balwetši ba bantši kudu. Go fokotša malwetši
a go swana le madiamagolo (high blood pressure) le swikiri, Kgoro ya gešo e hlomile
mananeo a go dira gore batšofadi ba itšhidulle, ba bapale dipapadi tša go fapafapana.
Mananeo a rena a go swana le la go sepela 5km ga a nyake tšhelete goba ditlabelo tša go tura
– seo a se nyakago ke boitlemo le maikemišetšo.
“Kua gagešo GaMotodi kgauswi le Burgersfort, ke hlomile sehlopha se segolo sa batšofadi.
Ba itšhidullela lepatlelong la kgwele ya maoto. Mesong ya letšatši le lengwe le le lengw, ba a
itšhidulla. Ge ba eya dikliniking le dipetlela, ba botšwa gore swikiri ya bona e theogile kudu
goba malwetši a mangwe ga a sale gona. Ga go na sehlare sa go thibela goba go lwantšha
malwetši sa go feta go itšhidulla. Ga go na sehlare sa go phala go sepelela boipshino … wa
tšeya 2,5 km o eya kua, wa tšea e nngwe o bowa – ga go na sehlare sa go feta seo,” Maseko a
realo a hlohleletša batlamoletlong.
“Ke sepetše le lena… ke le bone … ke le tsebile. Ke le lokela ka tlase ga lehwafa la Kgoro ya
gešo. Ke dihlopha tše dintši go ralala le profense tšeo re di beilego ka tlase ga lehwafa la
Kgoro. Re šomišana le Kgoro ya Tlhabollo ya Leago. Ka mananeo a yona le mananeo a rena
a dipapadi, re tla bona gore na re ka le thuša bjang gore le phele le fodile. Lena tšwelang pele
go sepela … le dikologe le mapatlelo a dipapadi … le sepele. Ka go dira bjalo, ke gona ge le
ikalafa le go thibela malwetši,” gwa realo Maseko a tiišitše ka ganong.
