Masogana le banna ba go feta 7 000 ba boloditšwe mafelong a maphelo go ralala le profense
ya Limpopo. Se se tla ka morago ga gore Molekgotlaphethiši wa Kgoro ya Maphelo,
Dieketseng Mashego, a thakgole lenaneo la go bolla ka Labohlano la 20 Phupu. Go tloga
letšatšing leo go fihla gabjale, palo ya banna bao ba boloditšwego e fihlile go 7 000. Mo
palong yeo, 700 ke ya banna ba mengwaga ya go tloga go 15 go ya godimo.
Go hlaotšwe mafelo a go feta 100 a go bolotša go ralala le dilete tše hlano tša Limpopo
gomme baagi ba kgopelwa go tšwela pele go ingwadiša le go tšea karolo. Lenaneo le la
profense le lebeletše go thuša go thibela phetetšo ya twatši ya HIV le go kaonafatša maphelo
a banna. Lebollo le laeditšwe go fokotša dikgonagalo tša phetetšo ya twatši ya HIV.
Dipalopalo di bontšha gore selete sa Vhembe se etile pele ka palo ya 1 608 ya banna bao ba
boloditšwego, gwa latela Waterberg ka 1 220. Dipalopalo tša Mopani le Sekhukhune le tšona
di fetile 1 000, mola Capricorn e le ka fase ga 1 000. Mafelo ao a šomilego kudu lenaneong le
ke dipetlela tša Dilokong, Tshilidzini le Thabaleshoba Community Health Centre.
Molekgotlaphethiši Mashego o bontšhitše lethabo ka tšwelopele ya lenaneo le. “Re thabela
dipoelo tše re di bonago go fihla gabjale. Palo ya banna bao ba tšwelelago go bolla e bontšha
gore go na le tsebo le kwešišo ya mohola wa lenaneo le,” a realo.
O hlohleletša ka moka bao ba nago le kgahlego ya go tšea karolo lenaneong le go etela
mafelo a maphelo a kgauswi le bona.
“Re nyaka go gatelela gore go bolla go dirwa mahala ke bašomi ba maphelo bao ba nago le
tsebo le boitemogelo. Lenaneo le buletšwe le bana ba mengwaga ya go tloga go 10 go ya
godimo,” a realo.
