POLOKWANE: G20 ke seboka sa dinaga tše 19 dihlopha tše pedi tša dilete tšeo e lego European
Union le African Union. Seboka se se bopša ke dinaga tša go huma tšeo di akaretšago Dinaga tša
Kopano tša Amerika (USA), dinaga tša Yuropa bjalo ka Engelane, Fora le Jeremane; dinaga tša
Asia bjalo ka China, Russia, Japan le India le dinaga tša Bohlabelagare bjalo ka Saudi Arabia,
United Arab Emirates gammogo le Afrika Borwa. Bodulasetulo bja seboka se ke bja ngwaga ka
ngwaga bja thetha. Mo ngwageng wo, bodulasetulo bo swerwe ke Afrika Borwa fao
Mopresitente Matamela Ramaphosa e lego Modulasetulo yo a tla neeletšago Mopresitente
Donald Trump wa USA maemo ao mafelelong a ngwaga wo.
Ka Mošupologo wa 26 Mopitlo (Mei) 2026, Kgoro ya Thuto ya Limpopo e swere kopano ya
kgoparara ya G20 hotelengtsoko ka ntlenyana ga Polokwane ka nepo ya go kaonafatša boteng /
boleng (khwalithi) ya thuto le go matlafatša bašomi ba Kgoro ye.
“Bjalo ka Kgoro ya Thuto mo Limpopo, ke lethabo le legolo go rena go le amogela mo
profenseng e botse ye. Bjalo ka Kgoro, nepo ya rena ke go bopa thuto ya motheo e maatla.
Profense ya rena ke ya boraro mo nageng ya go swara khonferense ya G20 ka gore re dumela
gore khonferense e bjalo e tla re fahlela ka dikgopolo, dikeletšo le tlhahlo tšeo di tla re thušago
go aga thuto ya motheo e maatla. Re dumela gore ge re ka kgona go aga thuto ya motheo e
maatla dikolong tša rena, seo se tla re beya maemong a makaone a go aga ekonomi e maatla ya
gosasa le ka moso,” gwa realo Molekgotlaphethiši wa Thuto, Mme Mavhungu Lerule-
Ramakhanya, yo e bego e le molaolalenaneo, nakong ya ge a amogela baeng.
“Mopresitente wa pele wa ANC, Tata Oliver Tambo, o ile a re: ‘Setšhaba seo se sa hlokomelego
bana ba sona, ga se na bokamoso’. Bjalo ka profense ya dinagamagaeng, re rwele boima ka
kgatelopele yeo e fokolago. Thuto ga se boikarabelo bja Kgoro ya Thuto ka noši eupša bja
setšhaba ka kakaretšo. Ngwana ge a hwetša thuto ya maleba go tloga bonnyaneng, o hwetša
monyetla wa go gola, a sepela tsela e botse ya dithuto tša gagwe. Re lemogile gape gore, mo
leetong la tshepedišo ya thuto, barutiši ga ba bapale feela karolo ya go ruta bana eupša ke bona
motheo wa diphetogo. Ka go realo, re swanetše go netefatsa gore bona barutiši ba, ba abelwe
ditlabakelo tša titšithale tša sebjale gore ba kgone go kgokagana ka theknolotši ge ba ruta ka
mephatong,” gwa realo Tonakgolo, Ngk. Phophi Ramathuba nakong ya ge a bea mantšu.
Mna Andre Vivier wa UNICEF o hlalositše dintlha tšeo mmušo o swanetšego go di ela tlhoko go
thuša go hlatloša maemo a thuto go bana ba dikolo. Magareng ga tše dingwe o rile: “Go
bohlokwa gore bana ba thome go hwetša thuto pele ga ge ba thoma sekolo go Kreiti RR goba
yona Kreiti R. Pele bat homa sekolo ke yona nako e botse ya go kgona go lekola le go swayela
ngwana tseleng ya go latela thuto mola ebile o tla be a fahlogela bokamoso bja gagwe. Ke taba
ya go ruta bobjohle bja ngwana. Batswadi ba swanetše go angwa go morero wa thuto di tloga
fase ka gore ke bona barutiši ba mathomo ba ngwana. Batswadi ba swanetše go angwa bjalo ka
badirišani go thuto ya bana ba bona. Go aga motheo o maatla wa thuto, go nyakega barutiši bao
bao ba kgonagatšago go ithuta magareng ga bana. Mekgwa ye e akaretša go ithuta ka go bapala
fao bana ba ithutago leleme le metheo ya dipalo. Gape go bohlokwa gore bana kgone go fihlelela
methopo le ditlabakelo tša thuto”.
Kopano ye e be e tsenetšwe ke baetapele ba dikgoro tša mmušo, dikolo gammogo le boraditaba.
Letšatši e bile la dikakanyo le dikgopolo go tšwa go diboledi tša makala le dikgoro tša mmušo,
borakgwebo le dikolo. Bona ba be ba sekaseka mekgwanakgwana yeo e ka thušang mmušo le
Kgoro ya Thuto go kaonafatša maemo a thuto.
