SESHEGO: Kereke ya African Methodist Episcopal (AME) e ketekile Sontaga ka go apeša
maloko a kereke dipataka. Kereke e apešitše maloko dipataka go ya ka maemo a wona
gammogo le go amogela maloko a maswa go la Zone 1, Seshego, ka ntle ga Polokwane.
E bile Sontaga se sebotse moo maloko gammogo le baetapele ba kereke ba go feta 200 ba
kopanego go keteka le go roriša Modimo. Ba opetše dikoša mme ba roriša Modimo ka
maphelo a bona le gore o tšwela pele go šireletša malapa a bona.
Moruti Allen Sefora o re o tliša maatla a seporofeto sa thero go maloko a kereke. “Ke mo go
porofeta le go botša phuthego seo Modimo a se bolelago,” a realo. Sefora o re ba nyakile go
dira se sengwe ka morago ga lehu la Jesu Kreste gore ba se fele tlhohleletšo.
“Ge o na le kobo ya thorišo, o tla tseba gore o bolele eng ka gore Modimo o tla ba a go eletša.
O ka se be le kobo ya thorišo ge o seba ka mongmošomo wa gago, motho yo a go godišetšago
bana, bagwera le batho ba bangwe,” a realo.
Nakong ya ge a bolela le maloko a maswa, o re go apara dipataka ga se go pepenka goba go
kgotsofatša batho ba bangwe.
“Le swanetše gore le tiye moyeng ka gore batho ba bangwe ba ile go bolela le go ngongorega
ka lena. Le se ke la tagwa ka gare ga dipataka tšeo goba la hlokofatša balekani ba lena ka
gore le tsošološitšwe ka leswa,” a realo.
O re batho ba bolela maaka ba apere lepanta la nnete gammogo le seaparo sa kereke. “Re
swanetše gore re rere lentšu la khutšo esego la lehloyo,” a realo. Sefora o boletše gape ka
mathata a dikgaruru tša bong (GBV). O re ge motho a na le tšhireletšo ya Modimo, a ka se
bone mosetsana bjalo ka lekgarebe.
“O tla bona mosetsana bjalo ka ngwana mme wa se gopole go mo phaya thetho ka kgang. Re
swanetše go apara lepanta la nnete ka gore ge o se na lepanta la nnete, o tla hlokofatša batho.
A re šomišeng lentšu la Modimo go thibela GBV,” a realo.
Leloko la kereke, Prince Pitjeng (31) o re o kwele a hlogonolofaditšwe go ba ka kerekeng.
“Thero ya Moruti e be e na le maatla mme ge re ka phela ka seo a se boletšego, re ile go
phela lefelong la khutšo,” a realo.
