GIYANI: Baithuti ba lapišitšwe ke mathata a bona a go se rarollwe. Ka fao, baithuti ba
kholetšhe ya Letaba TVET khampaseng ya Giyani ba ile ba tsenela mogwanto wa boipelaetšo
go dikgonono tša bomenetša kgahlanong le bolaodi bja kholetšhe. Se se tla ka morago ga
gore ba iše lengwalo la dingongorego tša bona ka Labohlano, 25 Moranang tšeo ba rego ga se
di rarollwe.
Magareng ga dingongorego tšeo, go akaretšwa taba ya kabelo ya sekhwama sa mašeleng a
thušo ya baithuti (NSFAS) ka ge ba re baithuti ba go feta 800 ga se ba hwetše mašeleng a
bona (allowance) a dikgwedi tše pedi le ge ba loketšwe ke go a hwetša. Ba re baithuti ba
tshela ba fegilwe ka morago ga go laetša dingongorego tša bona tša mašeleng a.
“Kholetšhe e re lahlile mme ga re swarwe go swana. Ke ka lebaka leo re ipelaetšago ka gore
re nyaka mathata a rena a rarollwa,” gwa realo moithuti (19).
Ba re ba bangwe ba bona ba lahlegetšwe ke madulo. “Beng mafelo ba re kobile ka gore re
palelwa ke go ba lefa mme ba bangwe ba hweditše mangwalo a go ba koba. Go kwagala gore
lefapa la thekgo ya baithuti le gapeletša beng mafelo a bodulo bao ba šomišanago le NSFAS
gore ba kobe baithuti bao ba ngongoregago ka mašeleng a bona. Ba dira se go ba tswalela
melomo,” gwa realo yo mongwe wa baithuti (21).
Ba ngongoregile gape ka tshotlo go tšwa go bafahloši ba bona. “Go gononwa gore ba bangwe
ba barutiši ba gapeletša baithuti gore ba ratane goba ba robale le bona gore ba kgone go ba
thuša,” gwa realo moithuti.
Ba re ba nyaka gore mošomi wa tša thekgo ya baithuti a lebogišwe mošomo ka ponyo ya
leihlo ka lebaka la kgethologanyo ya bong le semorafe gammogo le go se šome gabotse. Ba
re mošomi yoo o thekga feela baithuti ba Basotho ba Leboa le bao ba tšeyago karolo go
dipapadi, bokgabo le setšo.Ba ikemišeditše go tšwela pele ba ipelaetša go fihla dinyakwa le dingongorego tša bona di
rarollwa. Efela mmoleledi wa kholetšhe, Godfrey Mabasa, o re ga ba tsebe ka ditatofatšo tša
tshotlo ka ge go se na molato wo o begilwego.
“Bafahloši ba tseba ka melao ya kholetšhe ya maitshwaro. Re hlohleletša baithuti gore ba
bege melato yeo gammogo le ya bomenetša le bosenyi ka sephiring ka ge kholetšhe ye e le
lefelo la go hloka bosenyi,” a realo.
Mabasa o re baithuti bao ba swanelwago ke go hwetša mašeleng a NSFAS ba a hweditše,
efela go na le bao ba sa a hwetšago ka ge go sa emetšwe tshepedišo ya tekolo.
“Bolaodi bja kholetšhe bo swere kopano le baemedi ba baithuti ka Labobedi, 6 Mopitlo 2025
go rarolla mathata a baithuti gammogo le mathata a NSFAS. Dihlopha ka moka di dumelane
gore boipelaetšo bo fele mme bolaodi bo hwetše nako ya go šogana le mathata a,” a realo.
