Mokgatlo wa Democratic Alliance (DA) mo Limpopo o nyaka gore dipoelo tša dinyakišišo
tša leeto la diphadišano tša dipapadi go la Bloemfontein di lokollwe. Se se tla ka morago ga
gore Tonakgolo Ngk Phophi Ramathuba a palelwe ke go phethagatša tshepišo ya gagwe ya
gore dipoelo tša dinyakišišo tša gore ke ka lebaka la eng dibapadi tša sehlopha sa Limpopo di
ikgogetše morago go diphadišano tša South African Schools Athletics Championship go la
Bloemfontein tšeo di thomilego ka Laboraro la 2 go fihla ka Sontaga sa 6 Moranang 2025.
Dibapadi di ile tša ikgogela morago ka morago ga gore di hloke madulo le dijo.
Go thwe ba bangwe ba baphadišani gammogo le bahlahli ba bona ba gapeletšegile go robala
ka gare ga dinamelwa tša bona mola ba bangwe ba feditše bošego ka moka ba se na dijo.
Ka Labohlano la 11 Moranang 2025, Tonakgolo Ramathuba o ile a kgopela tshwarelo ka
maemo ao dibapadi di fetilego go wona mme a tshepiša gore dinyakišišo tša go tlala di ile go
dirwa le go phethwa lebakeng la kgwedi.
Mmoleledi wa tša dipapadi, bokgabo le setšo mokgatlong wa DA, Franco Marx, o re nako
yeo Ramathuba a e beilego e fetile efela ga go na dipoelo tšeo di phatlaladitšwego. O re ba
nyaka gore dipoelo tšeo di lokollwe ka ponyo ya leihlo ka ge batswadi, barutiši le batho ba
Limpopo ba swanelwa ke go hwetša nnete le toka esego setu.
“Mantšung a Ramathuba, o dumetše gore tiragalo ye ga se yeo e ikgethilego efela ke
ditlamorago tša go hloka šedi. Ge e le gore mmušo o ikemišeditše go boikarabelobja wona, o
swanetše go bonagala o tšeya magato ntle le go dikadika,” a realo.
O re setu ga se amogelege. Ka fao, ba ile go iša lengwalo la semmušo la dipotšišo go
Molekgotlaphethiši wa Kgoro ya Dipapadi, Bokgabo le Setšo, Jerry Maseko le
Molekgotlaphethiši wa Kgoro ya Thuto, Mavhungu Lerule-Ramakhanya, ba nyaka karabo ka
gore dinyakišišo di phethilwe.
“Ba swanetše go re botša mabaka a gore ke ka lebaka la eng dipoelo di šaletše morago. Re
nyaka go botšwa ka magato a kgalemo ao a tšerwego gammogo le nako ya nnete yeo dipoelo
tšeo di tlago go lokollwa,” a realo.
Mmoleledi wa mmušo wa profense, Ndavhe Ramakuela, o re dipoelo tša dinyakišišo ga se tša
fetšwa.
“Dinyakišišo tša pele di laeditše gore dinyakišišo tša go tsenelela di swanetše go dirwa go
lebelela melato ya kgale ya go tswalana le wo le go lekola ge e ba dinyakišišo tša ka ntle di
tla nyakega goba aowa,” a realo.
O netefaditše gore go ka tšeya nako ya go feta yeo e bego e beilwe mme nako ye ntshwa ya
gore dinyakišišo di tla fela neng ga se e bewe.
