POLOKWANE: Ka morago ga gore go be le dipego tša mahu a bana ngwageng wa go feta ao go
gononwago gore a hlotšwe ke dijo tšeo di rekilwego mabekeleng a diSpaza, go ile gwa
tsebagatšwa gore borakgwebo ba swanetše go ngwadiša dikgwebo tša bona. Se se be se nepile
gore mmušo o tle o kgone go lekola dijo le dilo tšeo di rekišwago go netefatša gore ke tšeo di lego
molaong. Go tsebagaditšwe gore boingwadišo bo tla fihla mafelelong ka la 28 Dibokwane 2025.
Kgoro ya Tlhabollo ya Ekonomi, Tikologo le Boeti ya Limpopo (LEDET) e lemoša borakgwebo
ba diSpaza bao ba sego ba ngwadiša dikgwebo tša bona gore ba di tswalele go thoma ka di 01
Mopitlo 2025. Pego ya Kgoro e hlaloša go re: “Boingwadišo bja mabenkele a diSpaza bo thomile
ka la 14 Phupu 2024 go fihla ka 28 Hlakola 2025. Dimasepala tša selegae tše 22 go ralala le
profense e kgethilwe bjalo ka disenthara tša go ngwadiša dilaesense. Go bile le dikgopelo tša go
feta 5700 go thoma kgweding ya Mosegamanye 2024 go fihla 24 Pherekgong 2025 fao tše 484 tša
tšona e lego tša bafaladi. Tše 4426 tša tšona di dumeletšwe efeela dipalopalo di fetoga letšatši ka
letšatši,”
Mmoleledi wa LEDET, Zaid Kalla, o tiišeleditše gore tshepedišo ya boingwadišo ke ya maleba.
“Batho ba hlohleletšwa go bega mohuta ofe goba ofe wa bomenetša bjo bo amanago le
boingwadišo bja dikgwebo mo profenseng. Mmušo o tla šogana natšo ka go otla bohle bao ba
huetšago bomenetša. Batho ka moka bao ba sa kgotsofatšwego ke sephetho sa Dimasepala tša
selegae ge ba ngwadiša dikgwebo tša bona, ba ka dira boipelaetšo go Molaodi wa Kgwebo kua
LEDET go sepelelana le Molao wa Boingwadišo bja Dikgwebo wa Limpopo,” a realo a laetša
gore batho ba swarwa go lekana.
Kalla o tšwetše pele ka go re: “Mmušo o na le matlotlo a go thuša borakgwebopotlana/dikgwebo
tše dinnyane (SMMES) ka moka, e ka ba ba ditoropong goba dinagamagaeng. Re na le tshepo ya
gore setšhaba sa rena se tla holega kudu go tšwa go matlotlo a,” a realo a laetša gore mmušo o
thekga borakgwebo.
