SEKHUKHUNE: Mokgatlo wa Democratic Alliance (DA) mo Limpopo o nyaka gore
African National Congress (ANC) e rake yo mongwe wa makhanselara a bona. Mokhanselara
wa DA go la Sekhukhune, Nico Pienaar, o ipiletša go ANC gore e fege boleloko bja
mokhanselara, Tobius Malope, masepaleng wa Elias Motsoaledi ka ponyo ya leihlo.
Se se tla ka morago ga gore Malope a golegwe mme a tšwelele pele ga kgoro ya tsheko ka
Mošupologo, 13 Pherekgong 2025, molatong wa go gapeletša go lefiša motho ka kgang
(extortion). Se se direga ka morago ga gore maphodisa a hwetše ngongorego go tšwa go
motšwasehlabelo wa mengwaga ye 54 yo a nago le khamphane ya dikontraka yo a rego o
latilwe ke sehlopha sa batho bao ba bego ba etilwe pele ke monna yo go gononelwago gore
ke mokhanselara.
Motšwasehlabelo yo o hweditše matšhošetši mme a botšwa gore maloko a setšhaba a ile go
ba kgahlanong la kontraka le gore bašomi ba ile go thibelwa go šoma.
Pienaar o re matšatši a go feta 30 a fetile ka morago ga gore a golegwe efela ANC e paletšwe
ke go fega mokhanselara.
“Se ke sešupo sa gore ANC ga e tšeye boikarabelo goba go iša šedi go mediro ya
makhanselara a yona. Mmušo wa selegae o raloka karolo ye kgolo go kabo ya ditirelo. Efela
ANC e kgethile go ema le mogateledi wa maatla bakeng sa gore e eme le batho bao ba
swanetšego go šomelwa mme se ga se amogelege,” Pienaar a realo.
Pienaar o re intaseteri ya meepo go la Sekhukhune e bohlokwa go tlholo ya mešomo le kgolo
ya ekonomi. Efela, bomenetša le matšhošetši a gapeletša dikhamphane tša moepo gore di
tswalelwe, e lego tiragalo yeo e dirago gore tlhokego ya mešomo e golele godimo.
“Re swanetše go thekga tša moepo esego go raka babeeletši ka go ba gapeletša go lefa
tšhelete le go tsenya ya dipolitiki go merero ya kgwebo. Nakong ya ge mekgatlo e swanetše
gore e etiše pele tlholego ya mešomo, ANC e laetša mebala ya yona ya nnete ka go šireletša
bao ba dirago bomenetša,” a realo.
Mmoleledi wa ANC mo Limpopo, Jimmy Machaka, o re ga ba tsebe selo ka tiragalo ye. “Re
ile go boledišana le makala a rena a selete go la Sekhukhune ka ge e le bona bao ba
lebeletšego mešomo ya makhanselara. ANC mo Limpopo e ile go bolela feela ka morago ga
go hwetša ntlha le thito ya taba mabapi le tiragalo ye,” a realo.
