STEELPOORT: Tonakgolo ya Limpopo Dr. Phophi Ramathuba o sa tšwa go tsebagatša Protšeke ya Sinosteel Samancor TFC PV ka Tubatse Chrome Club. Ye ke kgato e kgolo ya lenaneo la maatla goba enetši ye e mpshafatšwago.
Lesolo le la maatla a letšatši le hlongwa nepokgolo e le go hlola mešomo, go fokotša ditshenyegelo tša tšweletšo ya mohlagase le go thekga tlhabollo ya go ya go ile. Protšeke ye e šomiša theknolotši ya solar photovoltaic (PV) ya go fetoša seetša sa letšatši go ba mohlagase. Thenolotši ye e fapana le dimeme (dipolante) tša mohlagase tša malahla. Difeme tša malahla di tšweletša muši, le digase le dikhemikhale tše dingwe ge di tsweletša mohlagase. Difeme tša maatla a letšatši ga di tšweletše dikhemikhale tše kotsi tša go ama leratadima, e lego seo se di dirago mothopo wo o hlwekilego wa maatla.
Dr Ramathuba o tšweleditše tirišano/tšhimišano magareng ga mmušo wa Limpopo le balekane ba lekala la praebete, go akaretšwa Kona Maanda, Sekhwama sa China-Afrika, Samancor le CGN Africa Energy bjalo ka e bohlokwa.
“Ka go diriša maatla a letšatši, re ka fokotša ditshenyagelo bakeng sa malapa le dikgwebo, ra fokotša merwalo ya tša ditšhelete le go godiša ekonomi ye e tiilego. Protšeke ye gape e fa kimollo ya ditšhelete go malapa le go thekga dikgwebo tša selegae. Mešomo le Menyetla ya Badudi ba magaeng, Protšeke ya Sinosteel Samancor e holofetša dibaka tša mešomo go baswa ba magaeng le ditsebi tšeo di nago le bokgoni, go tloga go dikarolo tša kago go ya go maemo a sethekgniki a nako ye telele. Se se sepelelana le pono ya mmušo ya go matlafatša ekonomi le go rarolla tlhokego ya mešomo,” realo.
International Renewable Energy Agency (IRENA) e hlaolosa gore Enetši ya letšatši e na le mehola e mentši yeo e ka re fago kabo ya maatla ye e sa felego. Se sengwe ke gore ye ke enetši yeo e hlwekilego, maatla a letšatši ga a tšweletše dikhemikhale, a boloka moya le tikologo.
Go ya ka ponelopele ya Limpopo, Dr Ramathuba o laeditše kholofelo ya gore projeke ye e tla hlohleletša maitapišo a go swana go ralala le profense. “Tsela ya go ya go enetši e tala goba ya go hlweka, e nyaka maatla a mafapa a ka bobedi ao a šomago mmogo. Limpopo le ikgafile go hlola tikologo yeo ditirišano tše di ka atlegago go yona,” a realo.
Protšeke ya Sinosteel Samancor TFC PV e swantšhetša bokamoso bjo bo phadimago, bjo botala goba bja go hlweka bja maatla goba enetši ya Limpopo. E rarolla mathata a mohlagase mola e beya mohlala wa tlhabollo ya go ya go ile mo Afrika Borwa.
